ក្ដាប់បានស្រីស្អាតពីរក្នុងដៃហើយ តែឥឡូវវ័ណ្ឌកមិនដឹងគិតយ៉ាងម៉េច!
ក្ដាប់បានស្រីស្អាតពីរក្នុងដៃហើយ តែឥឡូវវ័ណ្ឌកមិនដឹងគិតយ៉ាងម៉េច!
កាលពីមុន ខ្ញុំធ្លាប់បានសរសេរអត្ថបទមួយរៀបរាប់ពីខ្សែជីវិត របស់ខ្ញុំទៅ Bong Sabay ពីការ បរាជ័យចំពោះរឿងស្នេហាគ្រាដំបូងរបស់ខ្ញុំ។ បន្ទាប់ពីឆ្លងកាត់បទពិសោធន៍លើកទីមួយនោះមក ខ្ញុំបានព្យាយាមដកខ្លួនអោយកាន់តែឆ្ងាយពីរឿងស្នេហា ដោយចាប់ផ្តើមយកចិត្តទុកដាក់លើការសិក្សាជាអាទិភាពទីមួយ ហើយក៏បានកាត់បន្ថយនូវភាពឈឺចាប់ដែលធ្លាប់មានពីមុនផងដែរ។ខ្ញុំ បាទជាគរុនិស្សិតគ្រូកម្រិតឧត្ដមនៃវិទ្យាស្ថានជាតិអប់រំ ព្រមទាំងជានិស្សិតអនុបណ្ឌិត វិទ្យាសាស្ត្រអប់រំ នៃសាកលវិទ្យាល័យឯកជនមួយផងដែរ។ ពីមុន ខ្ញុំគិតថា បើសិនខ្ញុំរៀនពូកែ មានការងារល្អ និងធ្វើបានប្រាក់ខែខ្ពស់ សម្រាប់គូអនាគត គឺវាមិនពិបាកក្នុងការស្វែងរកនោះទេ តែផ្ទុយទៅវិញ ទោះបីជាខ្ញុំទទួលបានជោគជ័យច្រើនក្នុងការសិក្សា និងការងារយ៉ាងណាក៏ដោយ ក៏មនុស្សស្រីដែលខ្ញុំពេញចិត្តគេមិនស្រឡាញ់ខ្ញុំនោះឡើយ ហើយថែមទាំងធ្លាប់បានធ្វើអោយខ្ញុំឈឺចាប់ ទើបតែស្តានូវកិត្តិយស ក៏ដូចជាភាពល្អប្រសើរឡើងវិញក្នុងបច្ចុប្បន្នភាពនេះទេ។
រូបតំណាង
ខ្ញុំ
បានចំណាយពេលប្រហែល៧ខែដើម្បីរៀនសូត្រ
មិនគិតពីមនុស្សស្រីរហូតទាល់តែកាត់ចិត្តបាន។ ខ្ញុំបានដេកគិត
ពិចារណា ហើយបានសួរខ្លួនឯងម្ដងហើយម្ដងទៀត ទើបមានអារម្មណ៍ថា
ខ្លួនឯងបច្ចុប្បន្ននេះកំពុងតែមានចិត្តទៅលើមនុស្សស្រីទៀតហើយ។
សម្រាប់ពេលបច្ចុប្បន្ននេះ ខ្ញុំកំពុងតែ មានទំនាក់ទំនងជាមួយនារីពីរនាក់
ហើយពួកគេមានគុណសម្បត្តិ និងរូបសម្បត្តិល្អម្យ៉ាងម្នាក់។
ខ្ញុំពិបាកសម្រេចចិត្តណាស់ថា
ខ្ញុំគួរជ្រើសរើសមួយណាជាគូអនាគត។នារីទី១៖ គាត់មានអាយុដំណាលខ្ញុំដែរ ២៥ឆ្នាំ ហើយសព្វថ្ងៃជាបុគ្គលិកនៅអង្គការអន្តរ ជាតិមួយប្រចាំប្រទេសកម្ពុជា ដែលខ្ញុំក៏ជាអតីតបុគ្គលិកអង្គការនោះដែរ។ ឥឡូវនេះនាងរៀនជិតចប់ អនុបណ្ឌិតហើយ។ ខ្ញុំស្គាល់នាងរយៈពេល២ឆ្នាំហើយ ប៉ុន្តែមិនដែលទាក់ទងអ្វី ក្រៅពីរឿងការងារ នោះទេ ប៉ុន្តែពេលដែរខ្ញុំប្រឡងជាប់ក្របខ័ណ្ឌរដ្ឋ ក៏ចាប់ផ្ដើមចេះឆាតជាមួយគ្នា រហូតដល់និយាយ ទូរសព្ទជាមួយគ្នារាប់ម៉ោងទៀតផង។ ខ្ញុំមិនសូវនិយាយរឿងអ្វីផ្សេង ក្រៅពីការប្រើទស្សនៈ និងអ្វី ដែលទាក់ទងនឹងការងារ ព្រោះខ្ញុំធ្លាប់ធ្វើជាបុគ្គលិកសម្របសម្រួលគម្រោងដែរ គឺថាពួកយើងមាន កញ្ចប់ថវិកាច្រើនៗ ក្នុងមួយឆ្នាំ គឺយើងត្រូវធ្វើម្ដងគ្រប់គ្រងថវិកាអោយមានប្រសិទ្ធភាព ដែលនាំមក នូវសមិទ្ធផលស្របតាមទស្សនៈវិស័យគម្រោងផែនការ ដែរយើងចង់បាន។ ប៉ុន្តែស្រាប់តែពេលបច្ចុប្បន្ននេះ យើងបានចាប់ផ្តើមនិយាយពីរឿងអនាគត និងការរៀបចំផែនការជីវិត និងគ្រួសារនៅពេលអនាគតទៅវិញ។ ខ្ញុំមានអារម្មណ៍ថា ពេញចិត្តនឹងគេ ហើយគេក៏យកចិត្តទុកដាក់នឹងខ្ញុំដែរ។
នារីទី២៖ គាត់ក៏មានអាយុដំណាលខ្ញុំដែរ ហើយសព្វថ្ងៃ គាត់ជាឆ្មបកម្រិតមធ្យម ចេញពីសាលា គាត់ប្រលងជាប់ក្របខណ្ឌរដ្ឋ ហើយកំពុងបម្រើការងារជាមួយបងប្រុសខ្ញុំ ដែលជាពេទ្យ នៅជិតផ្ទះខ្ញុំដែរ។ ខ្ញុំទើបស្គាល់គាត់រយៈពេលមួយខែនេះទេ។ កាលពីមុន ខ្ញុំធ្លាប់លឺបងប្រុសណែនាំប្រាប់ខ្ញុំដែរ ថាចង់ដណ្ដឹងគាត់អោយខ្ញុំ ពេលដែលខ្ញុំបរាជ័យស្នេហាលើកទីមួយ។ ពេលនោះខ្ញុំមិន បានចាប់អារម្មណ៍នោះទេ ធ្វើមិនដឹង ហើយឡើងមកភ្នំពេញបាត់ទៅ។ កាលពីមួយខែមុន ខ្ញុំបាននាំ ក្រុមពេទ្យជនជាតិអាមេរិក កាណាដា និងកូរ៉េ ទៅមណ្ឌលសុខភាពដែលគាត់ធ្វើការ ដើម្បីជួយព្យាបាលដល់ប្រជាជនក្រីក្រនៅទីនោះ។ ដោយសារខ្ញុំធ្លាប់ជាបុគ្គលិកអង្គការនៅទីនោះ វាមិនពិបាក សម្រាប់ខ្ញុំក្នុងការរៀបចំចាត់ចែង និងអញ្ជើញអ្នកភូមិ ឬក៏អាជ្ញាធរចូលរួមនោះទេ។
ពេលដែលខ្ញុំទៅរកបងខ្ញុំនៅមណ្ឌល សុខភាព ក៏បានជួបអ្នកគ្រូពេទ្យឆ្មបហ្នឹង ហើយសួររកបងខ្ញុំ ព្រោះខ្ញុំខលទូរសព្ទមិនលើក។ ខ្ញុំហាក់ដូចជាមាននិស្ស័យជាមួយអ្នកគ្រូពេទ្យហ្នឹងមែនទែន ក៏ចាប់ផ្ដើមរកពាក្យនិយាយសួរនាំគេ។ ពេលនោះក៏ប្រកែកគ្នាទៀតផង ដោយសារខ្ញុំញោះគាត់។ ពេលនោះដែរ ដោយសារតែជនជាតិបរទេសទៅច្រើន ខ្ញុំក៏បានស្នើអោយអ្នកគ្រូជួយបកប្រែភាសាអង់គ្លេស ព្រោះក្រុមយើងត្រូវការអ្នកជួយ អ្នកគ្រូប្រាប់ថា គាត់មិនចេះអង់គ្លេសទេ ចេះតែភាសាបារាំង។
បន្ទាប់ពីជួយ ពិនិត្យព្យាបាលជំងឺរយៈពេល១ថ្ងៃ ទាក់ទងគ្នាចុះឡើងបានលេខទូរសព្ទ និងហ្វេសបុក អ្នកគ្រូពេទ្យ។ ក្រោយមកខ្ញុំក៏បានខលទៅលេងអ្នកគ្រូជារឿយៗ និយាយគ្នាហាក់ដូចជាត្រូវគ្នា ណាស់ ព្រោះយើងធំៗ ហើយការសិក្សាក៏វាសមល្មមហើយដែរ។ ទន្ទឹមគ្នានោះ ខ្ញុំក៏បានសួរនាំអ្នកគ្រូពីស្ថានភាពគ្រួសារ។ គាត់ជាកូនពៅដូចខ្ញុំដែរ តែខ្ញុំផ្ទុយពីអ្នកគ្រូពេទ្យ ព្រោះម្ដាយពុកខ្ញុំអនិច្ចកម្មអស់ហើយ។ អ្វីដែលពិសេសនោះ ខ្ញុំនិយាយត្រង់ៗ អ្នកគ្រូក៏និយាយត្រង់ៗដែរ។ ពេលដែលនិយាយគ្នា គាត់ថាខ្ញុំចង់ទាក់ទងញ៉ែគាត់មែនទេ ខ្ញុំមិនដឹងឆ្លើយថាយ៉ាងម៉េច ក៏ប្រាប់ទៅ។ វាបានធ្វើអោយពួកយើងមានពាក្យនិយាយគ្នាមិនចេះចប់។
ខ្ញុំ គិតហើយគិតទៀត ក្នុងបេះដូងរបស់ខ្ញុំគឺពិតជាមានអ្នកទាំងពីរមែន។ ខ្ញុំចែកមិនដាច់មួយ ណាខ្ញុំពេញចិត្តជាងមួយណានោះទេ ប៉ុន្តែខ្ញុំក៏មិនទាន់បានសារភាពប្រាប់អ្នកទាំងពីរថាស្រឡាញ់ នោះដែរ ព្រោះខ្ញុំគិតថា ពាក្យថាស្រឡាញ់អ្នកណាក៏និយាយបាន ចំណែកព្រាននារីវិញ ក្នុងមួយថ្ងៃ ប្រាប់គេថាស្រឡាញ់១០នាក់ក៏មិនឈឺក្បាល។ ខ្ញុំតែងតែប្រាប់ពួកគេថា សូមមើលពីសកម្មភាព ទង្វើរបស់ខ្ញុំ និង ដួងចិត្តខ្ញុំជាការសំខាន់។ សូមបញ្ជាក់ថា អ្នកទាំងពីរមិនស្គាល់គ្នានោះទេ ព្រោះមួយធ្វើការនៅ ខេត្ត មួយនៅស្រុក និងមួយការងាររដ្ឋ ឯមួយទៀតការងារអង្គការ។
ពី មុនខ្ញុំគិតថាគួរបិទបេះដូងខ្លួនឯង ៣ខែទៀតពេលរៀនចប់ស្រួលបួល ចាំគិតរឿងគូស្រករ តែពេលនេះ ខ្ញុំបានជួបអ្នកទាំងពីរហើយ ចាប់ផ្ដើមស៊ីជម្រៅក្នុងពេលតែមួយ ពិសេសជាងនេះទៅ ទៀត គឺខ្ញុំជាកូនកំព្រា ក្រត្រូវរកលុយខ្លួនឯង ខែ១០ទើបចាប់ផ្ដើមមានប្រាក់ខែរដ្ឋស៊ី។ ខ្ញុំក៏តែងតែ គិតថា ប្រាក់ខែរដ្ឋតិច និងធ្លាប់បោះបង់ក្របខណ្ឌខ ម្ដងហើយ ដូចនេះត្រូវចាប់ ក អោយជាប់ប៉ុន្តែចង់មានគូអនាគត ក៏បែកគំនិតផងដែរ ចង់ទៅធ្វើការអង្គការ៥ទៅ៦ខែដើម្បីរកបានលុយសម្រាប់រៀបការ។
សំណួរដែលខ្ញុំចង់សួរបងប្អូនប្រិយមិត្តអ្នកអាននោះគឺ៖
១. តើខ្ញុំគួរជ្រើសរើសយកនារីមួយណាដើម្បីធ្វើជាគូអនាគត?
២. តើខ្ញុំត្រូវធ្វើដូចម្ដេចចំពោះនារីម្នាក់ទៀត បើខ្ញុំជ្រើសរើសយកមួយ?
៣. តើខ្ញុំអាចព្យួរការងារគ្រូបង្រៀនរដ្ឋ ទៅធ្វើការអង្គការដែលមានប្រាក់ខែខ្ពស់ដើម្បីការ រៀបការដែរឬទេ?
ខ្ញុំបាទរងចាំនូវការផ្ដល់ជាមតិយោបល់ និងការណែនាំអប់រំមកលើរូបខ្ញុំបាទ។ សូមអរគុណ!
អត្ថបទ៖ ព. វ
No comments:
Post a Comment