Major Cineplex រោងភាពយន្តទំនើបបច្ចេកវិទ្យាចុងក្រោយ ប្រើទុន៥ លានដុល្លារពង្រីកសាខានៅកម្ពុជា
Major Cineplex រោងភាពយន្តទំនើបបច្ចេកវិទ្យាចុងក្រោយ ប្រើទុន៥ លានដុល្លារពង្រីកសាខានៅកម្ពុជា
រោងភាពយន្តខ្នាតអន្តរជាតិដែលមានឈ្មោះថា Major Cineplex នឹងបើកដំណើរការនៅក្នុងប្រទេសកម្ពុជា នាពេលឆាប់ៗ ក្នុងកញ្ចប់វិនិយោគប្រមាណ៥ លានដុល្លារអាមេរិកដែលធ្វើអោយកម្ពុជាក្លាយជា ប្រទេសមានរោងកុនទំនើបលំដាប់ទី ២ ប្រចាំតំបន់បន្ទាប់ពីប្រទេសថៃ ។វិនិយោគទុន ដ៏ធំលើឧស្សាហកម្មកម្សាន្ត កម្រិតយក្ខនេះស្ថិតក្រោមកិច្ចសហការរវាង Platinum Cineplexកម្ពុជា និង Cineplex Groupប្រទេសថៃ។
កៅអីបែបគ្រែដេក ដែលអតិថិជនអាចដេក និង ហូបអាហារ ហើយទស្សនាភាពយន្ដ (បន្ទប់ VIP)
តាមប្រសាសន៍ លោក ជី សិលា នាយកប្រតិបត្តិក្រុមហ៊ុន Sabay គឺថាPlatinum Cineplex កម្ពុជា បានចាប់ដៃគូជាយុទ្ធសាស្ត្រជាមួយ Cineplex group របស់ថៃ បង្កើតឡើងនូវមជ្ឈមណ្ឌលកម្សាន្តដ៏ធំមួយឯផ្សារទំនើប AEON Mall ដែលទើបបើកឲ្យមើលកន្លែងលក់កាលថ្ងៃទី ២០ សប្ដាហ៍មុនក្នុងរាជធានីភ្នំពេញ។ មជ្ឈមណ្ឌលកម្សាន្តនេះ ក្រៅពីមានរោងភាពយន្តទំនើប ក៏មានកន្លែងលេង Bowling បែប VIP (ឯកជន) ផងដែរ។
ក្នុងដំណើរការ ផ្សព្វផ្សាយពីការរីកចម្រើនលើវិស័យនេះ អ្នកសារព័ត៌មានកម្ពុជាចំនួន ៦ នាក់ មកពី ៤ ស្ថាប័នផ្សព្វផ្សាយល្បីៗមានទូរទស្សន៍ CTN កាសែតភ្នំពេញប៉ុស្តិ៍ កោះសន្តិភាព និង គេហទំព័រ Sabay ទើបបានបញ្ចប់ផងដែរនូវទស្សនកិច្ចផ្លូវការ នារោងភាពយន្តធំៗនៅក្រុងបាងកកប្រទេសថៃ រួមមាន រោងភាពយន្ត Paragon Cineplex នៅក្នុងផ្សារទំនើប Siam Paragon និង Mega Cineplex នៅក្នុងផ្សារទំនើប Mega Bangna ។
ប្រទេសថៃត្រូវបានគេចាត់ ទុកថា មានបទពិសោធន៍ក្រាស់ក្រែលើផ្នែកវិនិយោគរោងភាពយន្ដបែបទំនើបៗ ដូច្នេះ កម្ពុជា អាចដកស្រង់បទពិសោធន៍ និង នាំយកឧបករណ៍ទំនើបៗទាំងនោះមកកាន់ប្រទេសកម្ពុជាដែល ពីមុនមកមានទស្សនិកជនខ្មែរមួយចំនួនត្រូវជិះយន្តហោះទៅទស្សនា នៅទីនោះ។
Major Cineplex បានបង្កើតឡើងតាំងពីឆ្នាំ ១៩៩៥ ដោយ លោក Vicha Poolvaraluk នាយក Major Cineplex group។ បច្ចុប្បន្ននេះ មានសាល (ផ្ទាំងសំពត់ស) សម្រាប់ទស្សនាភាពយន្តសរុបចំនួន ៥០០ និង កន្លែងលេងប៊ូលីង ចំនួនជាង ៤០០ ខ្សែមាននៅក្នុងប្រទេសថៃ និង ប្រទេសឥណ្ឌា។
លោកជី សិលា តំណាងភាគីកម្ពុជាក្នុងកិច្ចអភិវឌ្ឍន៍ Major Cineplexលោក Vicha Poolvaraluk នាយក Major Group បានបញ្ជាក់ថា “ការបើក Major Cineplex នៅកម្ពុជា គឺជាការបើកដំណើរការមជ្ឈមណ្ឌលកម្សាន្តលើកដំបូងបន្ថែមនៅក្រៅ ប្រទេសថៃ”។
លោកថា នោះជាប្រភេទរោងកុនទំនើបនៅក្នុងតំបន់ ដែលមិនទាន់មាននៅប្រទេសហ្វីលីពីន ម៉ាឡេស៊ី សិង្ហបុរី ឡាវ និង ភូមា នៅឡើយទេ។ ហេតុផលដោយសារលោកបានស្គាល់សហគ្រិនក្នុងស្រុកខ្មែរ និង ប្រជាជនខ្មែរ-ថៃ មានបរិបទរស់នៅប្រហាក់ប្រហែលគ្នា ។
បន្ថែមលើ នេះ លោក Jim Patterson អ្នកចាត់ការទូទៅនៃរោងភាពយន្ត Paragon Cineplex បាននិយាយដែរថា ការបើកឲ្យដំណើរការរោងភាពយន្ត Major Cineplex នៅកម្ពុជា គឺសក្ដិសមបំផុត ខណៈប្រទេសកម្ពុជាកំពុងមានស្ថានភាពសេដ្ឋកិច្ចរីកចំរើន។
Major Cineplex ភ្នំពេញ ដែលគ្រោងបើកដំណើរការនៅចុងខែមិថុនានេះ ក៏មានកិច្ចសហការពីក្រុមហ៊ុន Cellcard ផងដែរ។ ការគាំទ្រពី Cellcard ទីលានប៊ូលីង នឹងត្រូវបានដាក់ឈ្មោះថា “Cellcard Blu-o”។ Major Cineplex បានដំណើរការកម្សាន្ត Blu-O យ៉ាងជោគជ័យ នៅប្រទេសថៃ ហើយ Major ក៏បានផ្ដល់ជូននូវអាហារ និង ភេសជ្ជៈដល់អតិថិជនផងដែរ។
សាលនៃរោងភាពយន្ដ Mega Cineplex ក្នុងផ្សារ Mega Bangna ថៃ
ដើម្បីឆ្លើយតបទៅនឹងការគាំទ្ររបស់ Cellcard គឺ Major Cineplex នឹងផ្ដល់ជូនអតិថិជន Cellcard ទាំងអស់នូវតម្លៃពិសេស ព្រមទាំងអាទិភាពកក់កន្លែងកម្សាន្ត។
លោក Ian Watson នាយកប្រតិបត្តិក្រុមហ៊ុន Cellcard ធ្លាប់បាននិយាយថា “ខ្ញុំគ្រាន់តែទទួលដំណឹងពីគម្រោងកម្សាន្ដដ៏មានគុណភាពនេះភ្លាម ខ្ញុំដឹងថា យើងត្រូវចូលរួមជាមួយគម្រោងនេះ។ Major ពិតជាគម្រោងកម្សាន្តឥតខ្ចោះ ហើយកិច្ចសហការរបស់យើងមិនគ្រាន់តែអាចឲ្យប្រជាជនកម្ពុជា ទទួលបានតម្លៃដ៏សមរម្យប៉ុណ្ណោះទេ ប៉ុន្តែ អតិថិជន Cellcard នឹងទទួលបានផលប្រយោជន៍គ្មានដែនកំណត់ផ្សេងទៀត។
លោក ជី សិលា ប្រធានក្រុមហ៊ុន Sabay ក៏បានលើកឡើងដែរថា ក្រៅពីក្រុមហ៊ុន Cellcard ក៏មានក្រុមហ៊ុនផ្សេងទៀតបានចូលរួមសហការ ដើម្បីធ្វើឲ្យតម្លៃចូលទស្សនានៅរោងភាពយន្តដ៏ទំនើបនេះ មានតម្លៃសមរម្យដែលកូនខ្មែរគ្រប់រូបអាចទទួលយកបាន ខណៈនៅប្រទេសថៃ មានតម្លៃថ្លៃស្របតាមស្ថានភាពជីវភាពរបស់គេ។
រោង ភាពយន្ត Major Cineplex នឹងបើកដំណើរការនៅកម្ពុជា ដែលមានសាលទស្សនាសរុបចំនួន ៧ ក្នុងនោះមានសាលមួយដែលមានលក្ខណៈ VIP (ឯកជន)។ នៅក្នុងមជ្ឈមណ្ឌលកម្សាន្ដនេះ ក៏មានទីលានលេងប៊ូលីង ចំនួន ១៣ ខ្សែ និង ទីតាំងបែបក្លឹបកម្សាន្តរាត្រី ដែលសមឥតខ្ចោះសម្រាប់កម្មវិធីជប់លៀងបែបឯកជន។
កន្លែងលេងប៊ូលីង Blu-O ក្នុងប្រទេសថៃ ដែលឧបករណ៍ទាំងនេះ នឹងនាំយកមកដល់ប្រទេសកម្ពុជាឆាប់ៗនេះ
លោក ជី សិលា រំពឹងថា មជ្ឈមណ្ឌលកម្សាន្តខាងលើនេះ អាចជាផ្នែកមួយចូលរួមផ្ដល់ការកម្សាន្តដល់ប្រជាជន ក្នុងនោះនិងធ្វើឲ្យមនុស្សគ្រប់គ្នាមានអារម្មណ៍ល្អ និង សុខភាពល្អ បន្ទាប់ពីអាចកាត់បន្ថយទុក្ខកង្វល់ ក្រោយពីធ្វើការហត់នឿយជាដើម។
ចង់ដឹងថា មជ្ឈមណ្ឌលកម្សាន្តគ្មានដែនកំណត់ល្អ និង ទំនើបកម្រិតណានោះ សូមរង់ចាំទាំងអស់គ្នានៅចុងខែមិថុនានេះ នឹងចាប់បើកដំណើរការហើយ នៅផ្សារទំនើប AEON Mall រាជធានីភ្នំពេញ៕
No comments:
Post a Comment