ស្ងាត់ៗ! សាលាក្រុងបញ្ជាទិញរថយន្ត ៨០ គ្រឿងទៀតរត់នៅផ្លូវជាច្រើន ឆ្លើយតបការគាំទ្រពីអ្នកដំណើរ
ស្ងាត់ៗ! សាលាក្រុងបញ្ជាទិញរថយន្ត ៨០ គ្រឿងទៀតរត់នៅផ្លូវជាច្រើន ឆ្លើយតបការគាំទ្រពីអ្នកដំណើរ
ឡានក្រុងប្រភេទ ៦០ កៅអីសម្រាប់ដឹកអ្នកដំណើរ ប្រមាណ ៨០ គ្រឿង ទៀតត្រូវបានសាលារាជធានីភ្នំពេញបញ្ជាទិញពីប្រទេសកូរ៉េខាងត្បូង សម្រាប់សេវាដឹកជញ្ជូនសាធារណៈ ដោយរត់លើផ្លូវជាច្រើន នៅចុងឆ្នាំនេះ និងដើមឆ្នាំ២០១៥ ខាងមុខ។ នេះបើតាមប្រសាសន៍របស់លោក ជាប តុង បុគ្គលិកគ្រប់គ្រងលើជើងចេញដំណើរសេវាឡានក្រុង។
បច្ចុប្បន្ន សាលារាជធានីភ្នំពេញ មានរថយន្តក្រុងចំនួន ១០ គ្រឿង រត់ពីគល់ស្ពានជ្រោយចង្វា ឆ្ពោះទៅស្ពានអាកាសក្បាលថ្នល់។
លោក ជាប តុង បានបន្ថែមថា ជំហានទី១ នឹងមកដល់ ក្នុងខែកក្កដា ចំនួន ៤០ គ្រឿង និងជំហាន ទី២នឹងអាចមកដល់ខែ តុលា ឬខែវិច្ឆិកា ចំនួន៤០គ្រឿងទៀត។ “រថយន្តក្រុងនេះមិនដូចនឹងរថយន្តក្រុងរត់រាល់ថ្ងៃនោះទេ ពោលគឺដូចគ្នានឹងរថយន្តក្រុង ដែលរត់នៅស្រុកគេដែរ”។
បើតាមលោក ជាប តុង រថយន្តក្រុងដែលបញ្ជាទិញចំនួន ៤០ គ្រឿង ក្នុងជំហានទី១ គ្រោងដាក់ឲ្យដំណើរ ក្នុងខែសីហា ក្រោយពីត្រួតពិនិត្យបច្ចេកទេសរួចរាល់ ព្រោះថា រថយន្តក្រុងនេះជាប្រភេទរថយន្តមួយទឹកប្រើនៅស្រុកគេ។ ចំណែក ៤០ គ្រឿង ដែលនឹងមកដល់ជំហានទី២ នឹងដាក់ឲ្យដំណើរការនៅដើមឆ្នាំ២០១៥ នៅលើកំណាត់ផ្លូវចំនួន ១៦ ខ្សែ ក្នុងរាជធានីភ្នំពេញ។
ជុំវិញបញ្ហានេះដែរ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មិនបានបញ្ជាក់ពីតម្លៃរថយន្ត ដែលបញ្ជាទិញមកនេះ មានតម្លៃប៉ុន្មាននោះទេ។ ប៉ុន្តែលោកថា ការបន្ថែមខ្សែរត់នៅលើផ្លូវជាច្រើន ក្នុងរាជធានីភ្នំពេញនេះ បង្ហាញពីភាពជោគជ័យ និងការគាំទ្រពីប្រជាពលរដ្ឋ ខណៈបញ្ហាសុវត្ថិភាព ក្នុងពេលធ្វើដំណើរ និងការចំណាយអស់តិចគឺជាអ្វី ដែលប្រជាពលរដ្ឋទូទៅមើលឃើញ។
លោក ឡុង ឌីម៉ង់ បានបន្ថែមថា បច្ចុប្បន្ននេះ ចំនួនអ្នកជិះរថយន្ត ក្រុងចាប់ពីចំណុចស្ពានជ្រោយចង្វាឆ្ពោះទៅក្បាលថ្នល់ មានចំនួន ១៣០០ នាក់ ក្នុងមួយថ្ងៃ ដោយចំណាយប្រាក់ ត្រឹម១៥០០រៀល តែប៉ុណ្ណោះ ខណៈកុមារ និងមនុស្សចាស់ជរា អាយុ ៧០ ឆ្នាំឡើងទៅ ព្រមទាំងជនពិការ មិនតម្រូវឱ្យបង់លុយសម្រាប់ សេវារថយន្តក្រុងនេះទេ៕
No comments:
Post a Comment