ខ្សែជីវិត ម្ចាស់មេដាយមាសពិភពលោក កែ ឡេង មិនសូវល្បីដូចវីរនារី ស៊ន សៀវម៉ី
ខ្សែជីវិត ម្ចាស់មេដាយមាសពិភពលោក កែ ឡេង មិនសូវល្បីដូចវីរនារី ស៊ន សៀវម៉ី
កីឡាការិនី កែ ឡេង
ផ្នែកកីឡាប៉េតង់កម្ពុជា បានឈ្នះមេដាយមាស
លំដាប់ពិភពលោកជូនជាតិកាលពីចុងឆ្នាំ២០១៣
ប៉ុន្ដែមិនសូវល្បីគគ្រឹកគគ្រេងដូចម្ចាស់មេដាយមាសថ្នាក់ទ្វីប
អាស៊ី ស៊ន សៀវម៉ី កាលពីដើមខែតុលាកន្លងទៅទេ។
ម្ចាស់មេដាយមាសពិភពលោករូបនេះជាកូនកំព្រាម្នាក់ដែលបានខិតខំ
ប្រឹងគ្រប់បែបយ៉ាងដើម្បីទទួលបានលទ្ធផលដ៏អស្ចារ្យសម្រាប់
ជីវិត និងមាតុភូមិកម្ពុជា។
តើប្រិយមិត្តស្គាល់ម្ចាស់មេដាយមាស លំដាប់ពិភពលោកផ្នែកកីឡាប៉េតង់របស់កម្ពុជាកម្រិតណា?
កីឡាការិនី កែ ឡេង
ដំណើរជីវិតជាក្មេងកំព្រា
កែ ឡេង កើតនៅឆ្នាំ ១៩៦២ នៅស្រុក រលាប្អៀរ ខេត្តកំពង់ឆ្នាំង។ ដើមឡើយគាត់រស់នៅជាមួយម្ដាយឯស្រុកកំណើត ប៉ុន្តែចូលដល់ឆ្នាំ ១៩៨០ ម្ដាយបានលាចាកលោក ទើបបានប្ដូរលំនៅមករស់នៅភ្នំពេញជាមួយបងស្រី។
កីឡាដែល កែ ឡេង
ចាប់ជាអាជីពដំបូងឡើយគឺបាល់ទះ។ ឆ្នាំ ១៩៨២
មានការប្រកាសជ្រើសរើសកីឡាការិនីបាល់ទះប្រចាំកងយោធពលខេមរភូមិន្ទ
ហើយគាត់បានសម្រេចចិត្តដាក់ពាក្យចូលរួមជាមួយគេ ព្រោះគិតថា
ខ្លួនជាស្រី ហើយក្មេងកំព្រាទៀត
ក៏សម្រេចចិត្តផ្ញើជីវិតលើកីឡា ដោយគិតថា គេអាចគ្រប់គ្រង
ផ្ដល់កន្លែងស្នាក់នៅ និងផ្ដល់ការហូបចុក បាន។
អំឡុងពេលជាកីឡាការិនីបាល់ទះ កែ ឡេង
ក៏បានជាប់ឈ្មោះជាបុគ្គលិកក្នុងក្រសួងការពារជាតិតែម្ដងរហូតដល់
សព្វថ្ងៃ។
ឆ្នាំ ១៩៨៧ ស្ត្រីជាក្មេងកំព្រាម្នាក់នេះបានរៀបអាពាហ៍ពិពាហ៍ជាមួយបុរស ម្នាក់ជាកងទ័ពជើងគោក ហើយសព្វថ្ងៃមានកូន ២ នាក់ដែលកូនប្រុសជាមន្រ្តីនៅក្រសួងការពារជាតិ និងចូលចិត្តលេងប៉េតង់ដូចម្ដាយដែរ ខណៈកូនស្រីពៅកំពុងសិក្សានៅសាកលវិទ្យាល័យភូមិន្ទវិចិត្រ សិល្បៈ។
កែ ឡេង ឈ្នះមេដាយមាសSea Game ទទួលប្រាក់ឧបត្ថម្ភពីណាហ្គាវើល
ដើមចមចាប់អាជីពជាកីឡាការិនីប៉េតង់
ឆ្នាំ ១៩៩៧
ក្រសួងការពារជាតិបានរំសាយក្រុមបាល់ទះនារី ទើបធ្វើឱ្យអ្នកស្រី កែ
ឡេង ប្ដូរអាជីពទៅហាត់កីឡាប៊ូលវិញ។
ចូលហាត់កាលនោះគ្រូបង្វឹកមិនចង់ជ្រើសយកទេ
ដោយចង់បានតែកីឡាការិនីណាដែលមានចរិតជាភេទទី៣
(ស្រីចារឹកប្រុស) ច្រើនជាង ព្រោះងាយនឹងហ្វឹកហាត់។
ដោយចង់ឈ្នះចិត្តគ្រូបង្វឹក កែ ឡេង ខិតខំហ្វឹកហាត់ និង
បង្ហាញសមត្ថភាពយ៉ាងល្អរហូតគ្រូបង្វឹកលាន់មាត់សរសើរ។
ដំណើរចេញទៅប្រកួតក្រៅប្រទេសលើកដំបូងហើយឈ្នះមេដាយមាសតែម្ដង
ឆ្នាំ ១៩៩៨ សហព័ន្ធកីឡាប៊ូល និង
ប៉េតង់កម្ពុជា បានរៀបចំប្រកួតជ្រើសរើសជើងឯកជាតិថ្នាក់ជាតិ
ដោយមានកីឡាករកីឡាការិនីជាច្រើនមកចូលរួមប្រកួត
ប៉ុន្ដែជាលទ្ធផលមានតែ កីឡាការិនី កែ ឡេង និង អ៊ុក ស្រីមុំ
តែប៉ុណ្ណោះដែលមានឈ្មោះជាប់ជម្រើសជាតិ។ អ្នកទាំង២
ជាក្រុមស្រ្តីមុនគេតំណាងឱ្យកម្ពុជាចេញប្រកួតក្នុងពានរង្វាន់
ជើងឯកអាស៊ីនៅសិង្ហបុរីឆ្នាំ ១៩៩៩។ ជាលទ្ធផលអ្នកទាំង ២
ដណ្ដើមបានមេដាយមាស ក្រោយបំបាក់ក្រុមថៃនៅវគ្គផ្ដាច់ព្រ័ត្រ។
កេ ឡេង និង មិត្តរួមក្រុមឈ្នះពានរង្វាន់ នៅជើងឯកអាស៊ីលើកទី១៧ នៅឥណ្ឌូណេស៊ី
ធ្វើយ៉ាងម៉េចទើបក្លាយជាជើងខ្លាំងកីឡាប៉េតង់?
តាមបទពិសោធន៍របស់កីឡាការិនីឆ្នើម
របស់កម្ពុជារូបនេះ
ដើម្បីលេងប៉េតង់ឱ្យបានខ្លាំងហើយជោគជ័យនៅពេលប្រកួត កីឡាករ
កីឡាការិនី ត្រូវតែខិតខំហ្វឹកហាត់ ដឹងបច្ចេកទេស
បូកផ្សំទាំងមានឆន្ទៈច្បាស់លាស់។
ចំណែកពេលប្រកួតត្រូវសង្កេតមើលឱ្យច្បាស់ពីចំណុចខ្លាំង និង
ខ្សោយរបស់គូប្រកួត ងាយនឹងយកឈ្នះគេ។
ដំណើរក្នុងការឈ្នះមេដាយពិភពលោករបស់ កែ ឡេង
ព្រឹត្តិការណ៍កីឡាប៉េតង់លំដាប់
ពិភពលោកសម្រាប់ស្រ្ដី Women’s Pétanque World Championships 2013
រៀបចំនៅទីក្រុង Montauban ប្រទេសបារាំង ចាប់ពីថ្ងៃទី ៤ ដល់ ៦ តុលា
ឆ្នាំ ២០១៣ ដោយ មានវិញ្ញាសាប្រកួតចំនួន ២
គឺវិញ្ញាសាសាវាយយកពិន្ទុ និង វិញ្ញាសា វាយក្រុម៣នាក់។
ជាលទ្ធផលកីឡាការិនីកម្ពុជាដណ្ដើមបានមេដាយមាសក្នុងវិញ្ញាសា វាយយកពិន្ទុ និង មេដាយសំរឹទ្ធក្នុងវិញ្ញាសា វាយក្រុម៣នាក់។
កីឡាការិនី កែ ឡេង
ជើងខ្លាំងខាងកីឡាប៉េតង់របស់កម្ពុជា
បានចេញមុខប្រកួតក្នុងវិញ្ញាសាវាយយកពិន្ទុ
រហូតដណ្ដើមបានមេដាយមាស។ ជំហានដំបូងកីឡាការិនី កែ ឡេង
បានប្រកួតវាយសន្សំពិន្ទុជាប់ចំណាត់ថ្នាក់លេខ ៦
ខណៈគណៈកម្មាធិការប្រកួតជ្រើសយក ១៦ នាក់ឡើងទៅប្រកួតវគ្គ ១ / ៨។
ចំណែកឯកីឡាការិនីជាប់ចំណាត់ថ្នាក់ពីលេខ ១៧ ដល់ ៤៣
ត្រូវប្រកួតគ្នាដណ្ដើមពានចំណាត់ថ្នាក់ទី២ គឺ Coupe De Nations ឬ
Nation Cup។
កែ ឡេង ពាក់មេដាយមាស ជើងឯកពិភពលោក
វគ្គពាក់ ៨ នាក់ចុងក្រោយ កែ ឡេង
របស់កម្ពុជាបានផ្ដួល កីឡាការិនី Simona Bagala របស់អ៊ីតាលី
ដើម្បីយកកៅអីឡើងទៅវគ្គពាក់កណ្ដាលផ្ដាច់ព្រ័ត្រ។ ចូលដល់វគ្គ ១/២
ផ្ដាច់ព្រ័ត្រកីឡាការិនីរបស់កម្ពុជានៅតែបង្ហាញភាពខ្លាំងរបស់
ខ្លួនដោយយកឈ្នះកីឡាការិនី Josepha Randriamiandrisoa របស់ប្រទេស
Madagascar មកពីទ្វីបអាហ្វ្រិក។ នៅវគ្គផ្តាច់ព្រ័ត្រ កីឡាកែ ឡេង
បំបាក់កីឡាការិនី Mouna Baji របស់ប្រទេសទុយណេស៊ីក្នុងលទ្ធផល ៣៨
ពិន្ទុ ទល់នឹង ២៧ ដើម្បក្រសោបបានមេដាយមាសពិភពលោកជួនជាតិ។
សរុបលទ្ធផលវិញ្ញាសានេះ កែ ឡេង
របស់កម្ពុជាឈ្នះមេដាយមាស ខណៈមេដាយប្រាក់បានទៅ កីឡាការិនី Mouna
Baji របស់ទុយណេស៊ី។ មេដាយសំរឹទ្ធស្ទួនបានទៅ កីឡាការិនី
Randriamiandrisoa របស់ប្រទេស Madagascar និង កីឡាការិនី Muriel Hess
របស់អាល្លឺម៉ង់។
ចំពោះវិញ្ញាសាវាយក្រុម៣នាក់
ក្រុមកីឡាការិនីកម្ពុជាមានឱកាសឡើងដល់វគ្គពាក់កណ្ដាល
ផ្ដាច់ព្រ័ត្រតែបែរជាភ្លាត់នៅក្រោមថ្វីដៃជម្រើសជាតិថៃ
ក្នុងលទ្ធផល ១៣ ពិន្ទុ ទល់ ៧ ពិន្ទុ។ ដូច្នេះកម្ពុជា និង កាណាដា
ឈរនៅលេខ ៣ ស្ទួន ទទួលបានមេដាយសំរឹទ្ធ ខណៈថៃ ដណ្ដើមបានមេដាយមាស។
ចំណែកម្ចាស់ផ្ទះ បារាំង ខកចិត្តបានត្រឹមមេដាយប្រាក់។
គោលបំណងទៅអនាគត
ដោយដើរលើផ្លូវកីឡាប៉េតង់មកជាង ២០
ឆ្នាំហើយ កីឡាការិនី កែ ឡេង
នឹងឈប់សម្រាកពីកីឡាប៉េតង់នៅឆ្នាំក្រោយ ដោយបែរទៅណែនាំ
និងទុកឲ្យថ្នាលយុវតីចូលមកជំនួសកន្លែងខ្លួនម្ដង។
“មានពេលខ្លះក្មេងៗ គ្នាល្អហើយ
តែបើយើងជួយណែនាំផ្លូវត្រូវឱ្យគ្នាទៀតនោះ កាន់តែល្អថែមទៀត។
កុំអោយដូចពួកខ្ញុំដំបូងឡើយគ្មានដឹងអីសោះ”។ កែ ឡេង បញ្ជាក់៕
-
ចំនួនមេដាយ កែ ឡេង ដណ្ដើមបានក្នុងឆាកអន្តរជាតិ គិតតឹ្រមដើមឆ្នាំ ២០១៤ឆ្នាំនៅប្រទេសពានរង្វាន់មេដាយ
ផ្សេងៗ កញ្ញា ១៩៩៩សិង្ហបុរីជើងឯកអាស៊ីលើកទី៣ មាស ១កញ្ញា ២០០១ម៉ាឡេស៊ីស៊ីហ្គេមលើកទី២១មាស ១តុលា ២០០១កម្ពុជាជើងឯកអាស៊ីលើកទី៥សំរឹទ្ធ ១កញ្ញា ២០០២ម៉ាឡេស៊ីជើងឯកអាស៊ីលើកទី៦មាស ១មិនា ២០០៣វៀតណាមពានប៉ាន់ប៉ាស៊ីហ្វិចប្រាក់ ១តុលា ២០០៣ថៃជើងឯកអាស៊ីលើកទី៧មាស ១ ពានសមាគម វិច្ឆិកា ២០០៣វៀតណាមស៊ីហ្គេមលើកទី២២ប្រាក់ ១ ធ្នូ ២០០៤វៀតណាមជើងឯកអាស៊ីលើកទី៨សំរឹទ្ធ ១ តុលា ២០០៥ជប៉ុនជើងឯកអាស៊ីលើកទី៩ប្រាក់ ១ សំរឹទ្ធ១វិច្ឆិកា ២០០៥ហ្វីលីពីនស៊ីហ្គេមលើកទី២៣ប្រាក់ ១ សំរឹទ្ធ ១កញ្ញា ២០០៦វៀតណាមជើងឯកអាស៊ីលើកទី១០មាស ១ សំរឹទ្ធ១កុម្ភៈ ២០០៧កម្ពុជាប៉ាន់ប៉ាស៊ីហ្វិចប្រាក់ ១កញ្ញា ២០០៧ថៃជើងឯកអាស៊ីលើកទី១១មាស ១ សំរឹទ្ធ ១វិច្ឆិកា ២០០៧ថៃស៊ីហ្គេមលើកទី ២៤ប្រាក់ ១កញ្ញា ២០០៨វៀតណាមវប្បធម៌ហូជីមិញមាស ១វិច្ឆិកា ២០០៩វៀតណាមអាស៊ីអ៊ីនឌ័រហ្គេមសំរឹទ្ធ ១កញ្ញាវៀតណាមវប្បធម៌ភ្នំពេញ-ហូជីមិញមាស ១ធ្នូ ២០០៩ឡាវស៊ីហ្គេមលើកទី ២៥សំរឹទ្ធ ១ធ្នូ ២០១០ឡាវជើងឯកអាស៊ីលើកទី ១៤មាស ១ពានសមាគម ធ្នូ ២០១០ឡាវជើងឯកស្រី្តអាស៊ីប្រាក់ ១ធ្នូ ២០១០ឡាវនារីឆ្នើមតំបន់អាស៊ីមាស ១ប្រាក់ ១វិច្ឆិកា ២០១១ឥណ្ឌូណេស៊ីស៊ីហ្គេមលើកទី ២១សំរឹទ្ធ ១ធ្នូ ២០១១ថៃជើងឯកអាស៊ីលើកទី១៥មាស ១សំរឹទ្ធ ១ធ្នូ ២០១២វៀតណាមជើងឯកអាស៊ីលើកទី១៦មាស ១ប្រាក់ ១កញ្ញា ២០១៣បារាំងជើងឯកស្រ្តីពិភពលោកលើកទី ១៤មាស ១សំរឹទ្ធ ១តុលា ២០១៣ឥណ្ឌូណេស៊ីជើងឯកអាស៊ីលើកទី១៧ប្រាក់ ១សំរឹទ្ធ ១ធ្នូ ២០១៣ មីយ៉ាន់ម៉ា ស៊ីហ្គេមលើកទី ២២ មាស ១
អត្ថបទ៖ ម៉ឺន រស្មី
No comments:
Post a Comment