រឿងរសើបក្នុងសង្គមសិល្បៈ តារាខ្មែរស្ទើរតែទាំងអស់ពេលចេញទៅសម្ដែងនៅក្រៅប្រទេសកាន់ផ្តិលដើរសុំលុយគេ!
រឿងរសើបក្នុងសង្គមសិល្បៈ តារាខ្មែរស្ទើរតែទាំងអស់ពេលចេញទៅសម្ដែងនៅក្រៅប្រទេសកាន់ផ្តិលដើរសុំលុយគេ!
ជារឿងមួយគួរឱ្យភ្ញាក់ផ្អើលនៅពេលប្រភពច្បាស់ការមួយនៅឯនាយ សមុទ្របង្ហើបថា សិល្បករ សិល្បការិនីខ្មែរស្ទើរតែទាំងអស់ឱ្យតែមានឱកាសចេញសម្ដែងនៅក្រៅប្រទេសឆ្លៀតកាន់ផ្តិល ឬថង់ដើរសុំលុយភ្ញៀវតាមតុ។ប្រភព ដែលជាអ្នកនាំតារាខ្មែរទៅច្រៀងនៅក្រៅប្រទេសខាងលើអះអាងថា ទង្វើបែបនេះរបស់តារាខ្មែរមិនមែនទើបកើតឡើងនោះឡើយ ពោលគឺកើតឡើងជាយូរមកហើយ។ ប្រភពសុំមិនបញ្ចេញឈ្មោះខាងលើនិយាយថា សិល្បករ សិល្បការិនីខ្មែរស្ទើរតែមួយរយភាគរយប្រព្រឹត្តិទង្វើដូច្នេះ។
អាកប្បកិរិយា បែបនេះ ពីសំណាក់តារាខ្មែរធ្វើឱ្យប៉ះពាល់ជាខ្លាំងដល់តារាដទៃទៀតដែល មានក្រមសីលធម៌ល្អ និង ធ្វើឱ្យប៉ះពាល់ទាំងមូលដល់វិស័យសិល្បៈរបស់ខ្មែរ។
រូបតំណាង
ប្រធានសមាគមសិល្បករខ្មែរ លោក សុះ ម៉ាច ទទួលស្គាល់ថា ករណីតារាខ្មែរដើរកាន់ផ្តិល ឬថង់សុំលុយភ្ញៀវតាមតុនៅពេលចេញទៅសម្ដែងនៅក្រៅប្រទេស គឺមានមែន។លោក សុះ ម៉ាច បានលើកឡើងដូចទៅនឹងប្រភពខាងលើដែរ គឺមានតារាខ្មែរស្ទើរតែទាំងអស់បានធ្វើទង្វើមិនគប្បីដូច្នេះ ខណៈភ្ញៀវដែលអញ្ជើញមកទស្សនាបានទិញសំបុត្រចូលទស្សនារួចទៅហើយ។ លោកបន្តថា លើកលែងតែតារាល្បីៗខ្លាំង មានប្រាក់ខែ និង លុយកាក់គ្រប់គ្រាន់មួយចំនួនតូចតែប៉ុណ្ណោះ មិនធ្វើទង្វើដូចខាងលើ។
ប្រធានសមាគមរូបនេះបញ្ជាក់ដូច្នេះ៖ “ខ្ញុំទទួលស្គាល់រឿងតារាខ្មែរយើងដើរកាន់ផ្តិល ឬថង់ដើរសុំលុយភ្ញៀវតាមតុពេលពួកគេទៅសម្ដែងនៅក្រៅប្រទេស។ ខ្ញុំមិនដឹងថា ពួកគាត់ធ្វើដូច្នេះមានន័យដូចម្ដេចនោះទេ”។
កត្តា នាំតារាខ្មែរស្ទើរតែទាំងអស់ចូលចិត្តដើរសុំលុយភ្ញៀវតាមតុពេល ចេញទៅសម្ដែងនៅក្រៅប្រទេស ត្រូវបានតារាចម្រៀង និងជាប្រធានសមាគមសិល្បករខ្មែរខាងលើអះអាងថា បណ្ដាលមកពីកត្តាជីវភាព ព្រោះសិល្បករ សិល្បការិនីខ្មែរភាគច្រើនមិនមានប្រាក់ខែទេ។ ដូច្នេះហើយឱ្យតែមានឱកាសចេញសម្ដែងនៅក្រៅស្រុកពួកគេច្រើនតែរក លុយក្រៅបន្ថែម ដើម្បីត្រឡប់មកស្រុកវិញសល់លុយកាក់ខ្លះ។
លោក សុះ ម៉ាច សង្កត់ធ្ងន់ថា មានសិល្បករ សិល្បការិនីខ្មែរខ្លះ សុខចិត្តចេញថ្លៃសំបុត្រយន្តហោះផ្ទាល់ខ្លួនឱ្យតែបានចេញទៅច្រៀងនៅឯនាយសមុទ្រ ក៏ព្រោះតែរឿងដើរសុំលុយភ្ញៀវនេះឯង។
បើ ទោះជាប្រភពច្បាស់ការ រួមទាំងប្រធានសមាគមសិល្បករខ្មែរលើកឡើងដូច្នេះក្ដី តារាចម្រៀងល្បីឈ្មោះរបស់ផលិតកម្ម សាន់ដេលោក ឆាយ វីរៈយុទ្ធ អះអាងថាមិនបានដឹងពីបញ្ហាអស់ទាំងនេះទេ។ លោកថាពេលលោកសម្ដែងនៅក្រៅប្រទេសមិនដែលមានរឿងដើរសុំលុយកាក់ ភ្ញៀវឡើយ។
តារាចម្រៀងល្បីឈ្មោះមានប្រភពមកពីខេត្ត កំពង់ចាមរូបនេះ មិនហ៊ានធ្វើអត្ថាធិប្បាយច្រើនឡើយ ដោយលោកខ្លាចប៉ះពាល់ដល់កេរ្តិ៍ឈ្មោះតារាផ្សេងទៀត ដោយលោកបង្វែរសំនួរឱ្យសួរតារាដទៃទៀត។
លោក ឆាយ វីរៈយុទ្ធ និយាយដោយខ្លីថា៖ “ខ្ញុំអត់ដែលដឹងរឿងនេះទេ បងសួរអ្នកផ្សេងទៅមើល ខ្ញុំអត់ហ៊ាននិយាយទេរឿងនេះព្រោះខ្លាចប៉ះពាល់ដល់អ្នកដទៃ”។
តាមការឱ្យដឹងពីប្រភពអ្នកនាំតារាទៅច្រៀងនៅក្រៅប្រទេសខាងលើ ក្រៅតែពីដើរសុំលុយភ្ញៀវតាមតុ ថ្លៃសំបុត្រចូលទស្សនា របស់តារាខ្មែរនៅក្រៅស្រុកបានធ្លាក់ចុះយ៉ាងគំហុក។ កត្តានេះបណ្ដាលមកពីតារាខ្មែរនាំគ្នាសម្រុកទៅសម្ដែងច្រើននៅឯ បរទេស៕
No comments:
Post a Comment