សាកលវិទ្យាល័យ​ល្អ​ផ្ដាច់​គេ​ទាំង ១០ នៅ​​អាស៊ាន

សាកលវិទ្យាល័យ​ល្អ​ផ្ដាច់​គេ​ទាំង ១០ នៅ​​អាស៊ាន

 Sabay ​ធ្លាប់​បាន​ចុះ​ផ្សាយ​រួច​មក​ហើយ​នូវ សាកលវិទ្យាល័យ ៤ ដែល​មាន​តម្លៃ​សិក្សា​​ដល់​ពាន់​ដុល្លារ​នៅ​ក្នុង​ប្រទេស​កម្ពុជា​កាល​ពី​ ពេល​ថ្មីៗ​នេះ។ ថ្ងៃនេះ យើង​នឹង​នាំ​អ្នក​ទាំងអស់​គ្នា​ឲ្យ​ទៅ​ស្គាល់​សាកល​វិទ្យាល័យ​ដែល​ល្អ​ ផ្ដាច់​គេ​ទាំង ១០ នៅ​ក្នុង​តំបន់​អាស៊ាន​វិញ​ម្ដង។ ចំណាត់​ថ្នាក់​នេះ​គឺ​យក​ទៅ​តាម​គេហទំព័រ​ Topuniversities ដែល​ការ​ចាត់​ថ្នាក់​នេះ​មិន​យក​ទៅតាម​តម្លៃ​សិក្សា​ទេ គឺ​គេ​គិត​ទៅតាម​គុណភាព បរិស្ថាន កម្រិត​សិក្សា និង​កត្តា​រួម​ផ្សំ​មួយ​ចំនួន​ទៀត។ ចង់​ដឹង​អត់​! តើ​មាន​សាកលវិទ្យាល័យ​របស់​ប្រទេស​ណា​ខ្លះ?

១០. University of Indonesia ប្រទេស​ឥណ្ឌូណេស៊ី
សាកលវិទ្យាល័យ ​ជាតិ​ឥណ្ឌូណេស៊ី គឺជា​សាកលវិទ្យាល័យ​ចំណាស់​ជាង​គេ​នៅ​ក្នុង​ប្រទេស​ឥណ្ឌូណេស៊ី ដែល​ត្រូវ​បាន​បង្កើត​ឡើង​តាំង​ពី​ឆ្នាំ១៨៤៩។ សាកលវិទ្យាល័យ​នេះ​ចែក​ចេញ​ជា ១២ មហាវិទ្យាល័យ ដែល​អាច​ទាក់​ទាញ​និស្សិត​បាន​ជាង ៣០ ០០០ នាក់ រួម​ជា​មួយ​និស្សិត​បរទេស​ផ្សេង​ទៀត ដែល​ធ្វើ​ឲ្យ​សាកល​វិទ្យាល័យ​នេះ​ជាប់​ចំណាត់​ថ្នាក់​លេខ ១០ នៅ​ក្នុង​តំបន់​អាស៊ាន។
​
៩. Universiti Teknologi Malaysia (UTM) ប្រទេស​ម៉ាឡេស៊ី
Universiti Teknologi Malaysia អាច​ហៅ​បាន​ម្យ៉ាង​ទៀត​ថា University of Technology Malaysia (UTM) ដែល​ត្រូវ​បាន​គេ​ស្គាល់​ថា​ជា​សាកល​វិទ្យាល័យ​បច្ចេកវិទ្យា​ និង​វិស្វកម្ម​ចំណាស់​ជាង​គេ​របស់​ប្រទេស​ម៉ាឡេស៊ី។ នៅ​ក្នុង​ឆ្នាំ ១៩០៤ សាកលវិទ្យាល័យ​មួយ​នេះ បាន​បង្កើត​ឡើង​ជា​សាលា​បច្ចេកវិទ្យា​មួយ​ប៉ុណ្ណោះ ប៉ុន្តែ​វា​បាន​អភិវឌ្ឍ​ក្លាយ​ជា​សាកលវិទ្យាល័យ​នៅ​ក្នុង​ឆ្នាំ ១៩៧៥។ បច្ចុប្បន្ន មាន​និស្សិត​ប្រមាណ ២៥ ០០០ កំពុង​សិក្សា​នៅ​ក្នុង​​សាកលវិទ្យាល័យ​មួយ​នេះ។
៨. University of the Philippines (UP) ប្រទេស​ហ្វីលីពីន
សាកលវិទ្យាល័យ ​ជាតិ​ហ្វីលីពីន ត្រូវ​​បាន​បង្កើត​ឡើង​នៅ​ថ្ងៃ​ទី ១៨ ឧសភា ១៩០៨។ សាកលវិទ្យាល័យ​មួយ​នេះ មាន​ផ្ទៃ​ដី​សរុប​ប្រមាណ ៤៩៣ ហិតា ជាមួយ​នឹង​ចំនួន​និស្សិត ២២ ០៣១ នាក់(ស្ថិតិ​ឆ្នាំ​សិក្សា ២០១២-២០១៤)។ ឯកទេស​សំខាន់​នៅ​ក្នុង​សាកល​វិទ្យាល័យ​នេះ​គឺ វិស្វកម្ម និង​បច្ចេកវិទ្យា។
៧. Universiti Sains Malaysia (USM) ប្រទេស​ម៉ាឡេស៊ី
Universiti Sains Malaysia គឺ​ជា​សាកល​វិទ្យាល័យ​ដែល​បង្កើត​ឡើង​នៅ​ក្នុង​ប្រទេស​ម៉ាឡេស៊ី​ក្នុង​ឆ្នាំ ​១៩៦៩។ បច្ចុប្បន្ន សាកលវិទ្យាល័យ​នេះ​មាន​និស្សិត​ប្រហែល ២០ ០០០ នាក់។
៦. Universiti Kebangsaan Malaysia (UKM) ប្រទេស​ម៉ាឡេស៊ី
បច្ចុប្បន្ន ​នេះ សាកលវិទ្យាល័យ Kebangsaan មាន​និស្សិត​ប្រហែល​ ២៦ ៨៤៤ នាក់ ដែល​ក្នុង​នោះ​មាន ៣ ៣៤៧ នាក់​គឺ​ជា​និស្សិត​បរទេស​មកពី ៣៥ ប្រទេស​ផ្សេង​គ្នា។ ចាប់​តាំង​ពី​ការ​បង្កើត​ឆ្នាំ ១៩៧០ រហូត​ដល់​ឆ្នាំ ២០១១ មាន​និស្សិត​ចំនួន ១៤៦ ៤១៧ នាក់ ដែល​ក្នុង​នោះ​មាន​ទាំង​ថ្នាក់​បរិញ្ញាបត្រ ថ្នាក់​អនុបណ្ឌិត និង​ថ្នាក់​បណ្ឌិត បាន​បញ្ចប់​ការ​សិក្សា​ពី​សាកល​វិទ្យាល័យ​មួយ​នេះ។ ​
៥. Chulalongkorn University ប្រទេស​ថៃ
សាកលវិទ្យាល័យ ​ជូឡាឡុងកន គឺជា​សាកល​វិទ្យាល័យ​ចំណាស់​ជាង​គេ​ក្នុង​ប្រទេស​ថៃ និង​ជា​សាកល​វិទ្យាល័យ​មួយ​ដែល​មាន​កិត្យានុភាព​ផង​ដែរ។ សាកល​វិទ្យាល័យ​ចំណាស់​មួយ​នេះ​ត្រូវ​បាន​បង្កើត​ឡើង​ជា​ផ្លូវការ​នៅ​ថ្ងៃ​ ទី ២៦ ខែ​មិនា ឆ្នាំ ១៩១៧ ដោយ​ព្រះ​មហាក្សត្រVajiravudh (Rama VI)។ ​​បច្ចុប្បន្ន សាកល​វិទ្យាល័យ​នេះ​មាន​និស្សិត​ចំនួន​ជាង ៣២ ៥០០ នាក់។ កាល​ពី​បើក​ដំបូង​សាកលវិទ្យាល័យ​នេះ​ចែក​ចេញ​ជា ៤ មហាវិទ្យាល័យ​ប៉ុណ្ណោះ​គឺ មហាវិទ្យាល័យ​វេជ្ជសាស្ត្រ រដ្ឋបាល​សាធារណៈ វិស្វកម្ម ហើយនិង​សិល្បៈ​វិទ្យាសាស្ត្រ  តែ​បច្ចុប្បន្ន​បាន​កើន​ដល់​ ១៨ ​មហាវិទ្យាល័យ​ហើយ។
៤. Mahidol University (MU) ប្រទេស​ថៃ
សព្វថ្ងៃ ​នេះ​សាកលវិទ្យាល័យ Mahidol មាន​និស្សិត​ក្នុងស្រុក​​ចំនួន ៤ ៥០០ នាក់ និង​និស្សិត​បរទេស​ជាង ៦០០ នាក់​មកពី ៤០ ប្រទេស​ផ្សេង​ទៀត​កំពុង​សិក្សា​លើ​កម្ម​វិធី​ផ្សេងៗ។ សាកលវិទ្យាល័យ​នេះ​ចែក​ចេញ​ជា​ច្រើន​មហាវិទ្យាល័យ ប៉ុន្តែ​ឯកទេស​ខ្លាំង​បំផុត​គឺ​ខាង​ផ្នែក​ឱសថ(pharmacy)។​
៣. Universiti Malaya (UM) ប្រទេស​ម៉ាឡេស៊ី
សាកលវិទ្យាល័យ ​ជាតិ​ម៉ាឡេស៊ី គឺជា​សាកល​វិទ្យាល័យ​ទី ១ របស់​ប្រទេស​ម៉ាឡេស៊ី ដែល​ត្រូវ​បាន​សាងសង់​លើ​ផ្ទៃដី ៣០៩ ហិចតា​នៅ​ភាគ​​និរតី​នៃ​រាជធានី​កូឡាឡាំពួរ។ សាកល​វិទ្យាល័យ​នេះ​ត្រូវ​បាន​បង្កើតឡើង​នៅ​ឆ្នាំ ១៩៤៩។
២. Nanyang Technological University (NTU) ប្រទេស​សិង្ហបុរី
សាកល ​វិទ្យាល័យ​បច្ចេកវិទ្យា​របស់​ប្រទេស​សិង្ហបុរី គឺ​ជា​ទីកន្លែង​ស្រាវជ្រាវ​បច្ចេកវិទ្យា ​និង​វិស្វកម្ម​ធំជាង​គេ​មួយ​ក្នុង​ចំណោម​សាកលវិទ្យាល័យ​ទាំង ៤ នៅ​លើ​ពិភពលោក។ សាកល​វិទ្យាល័យ​នេះ​គឺ​ជា​ទីកន្លែង​សិក្សា​ចម្រុះ​ជាតិ​សាសន៍​ជាង ១០០ ដែល​មាន​និស្សិត​សរុប ៣៣ ៥០០ នាក់ បូក​រួម​និង​សាស្ត្រាចារ្យ អ្នក​ស្រាវជ្រាវ​ចំនួន ៤០០០ នាក់​ផ្សេងទៀត។​
១. National University of Singapore (NUS) ប្រទេស​សិង្ហបុរី
សាកលវិទ្យាល័យ ​ជាតិ​របស់​ប្រទេស​សិង្ហបុរី​មួយ​នេះ មិន​ត្រឹម​តែ​​ជាប់​ចំណាត់​ថ្នាក់​លេខ​មួយ​ប្រចាំ​តំបន់​អាស៊ាន​ប៉ុណ្ណោះ​ទេ ប៉ុន្តែ​វា​ក៏​ជាប់​ចំណាត់​ថ្នាក់​កំពូល​តារាង​នៃ​សាកល​វិទ្យាល័យ​ល្អ​ ផ្ដាច់​គេ​ប្រចាំ​ទ្វីប​អាស៊ី​ផង​ដែរ។ សាកល​វិទ្យាល័យ​មួយ​នេះ​មាន​និស្សិត​សរុប​ជាង ៣៧ ០០០ នាក់ មកពី ១០០ ប្រទេស ដែល​កំពុង​សិក្សា​នៅ​ក្នុង​មហាវិទ្យាល័យ​ទាំង ១៦៕
ប្រែសម្រួល៖ គង់ វិសាល
ប្រភព៖ topuniversities