លទ្ធផល​ប្រលង​បាក់​ឌុប​៖ បេក្ខជន​ជាង ២ ម៉ឺន​នាក់ ជាប់ ត្រូវ​ជាជាង ២៥ ភាគរយ ក្នុងចំណោម​បេក្ខជន​សរុប ជិត ៩ ម៉ឺន​នាក់

លទ្ធផល​ប្រលង​បាក់​ឌុប​៖ បេក្ខជន​ជាង ២ ម៉ឺន​នាក់ ជាប់ ត្រូវ​ជាជាង ២៥ ភាគរយ ក្នុងចំណោម​បេក្ខជន​សរុប ជិត ៩ ម៉ឺន​នាក់

ភ្នំពេញ: ក្រសួង​អប់រំ យុវជន និង​កីឡា បានប្រកាសថា ការប្រឡង​សញ្ញាបត្រ​មធ្យមសិក្សា​ទុតិយភូមិ ឬ​ប្រលង​បាក់​ឌុប ដែល​បាន​ប្រព្រឹត្តទៅ​កាលពី​ថ្ងៃទី​៤ និង​ថ្ងៃទី​៥​សីហា មាន​មណ្ឌល​ប្រលង នៅ​គ្រប់​រាជធានី ខេត្ត សរុប ចំនួន ១៥៤ មណ្ឌល បន្ទប់​ប្រលង​ចំនួន ៣.៦៨៣ បន្ទប់ និង​បេក្ខជន​មក​ប្រឡង​សរុប ចំនួន ៨៩.៩៣៧ នាក់​។ ក្នុងនោះ បេក្ខជន​ប្រឡង​ជាប់ មាន ២៣.១២៦ នាក់ ត្រូវជា ២៥,៧២%​។ នេះ​បើតាម​សេចក្តីប្រកាស​។​

​សេចក្តីប្រកាស​ព័ត៌មាន​របស់​ក្រសួង​ អប់រំ យុវជន និង​កីឡា បាន​បង្ហាញថា ការប្រកាស​លទ្ធផល បានធ្វើ​ឡើង នៅ​ថ្ងៃទី​២៩ ខែសីហា ឆ្នាំ​២០១៤ សម្រាប់​រាជធានី​ភ្នំពេញ និង​ខេត្តកណ្តាល នៅ​ថ្ងៃទី​៣០ ខែសីហា ឆ្នាំ​២០១៤ សម្រាប់​ខេត្ត​ដទៃទៀត​។​

​ជាមួយគ្នា ​នោះ មាន​សេចក្តីរាយការណ៍​ថា ការប្រលង​បាក់​ឌុប​លើក​នេះ មាន​សិស្ស ជាប់​និទ្ទេស A ទូទាំងប្រទេស ចំនួន ១១ នាក់​។ ក្នុងនោះ ៣ នាក់ នៅ​ភ្នំពេញ​។ ចំណែក​និទ្ទេស B មាន ២៨៩ នាក់​។ និទ្ទេស C មាន ៨០០ នាក់​។ និទ្ទេស D ១.៨៣២ នាក់ និង​និទ្ទេស E មាន ២០.០០០ នាក់​។​

​នៅ​រសៀល​ថ្ងៃទី​២៩​សីហា​ នេះ តាម​វិទ្យាល័យ​នានា ដែលជា​មណ្ឌល​ប្រលង នៅ​ភ្នំពេញ និង​នៅ​ខេត្តកណ្តាល លទ្ធផល​ប្រលង​បាក់​ឌុប ត្រូវបាន​បិទ​ផ្សាយ​។ ក្នុងនោះ ក្រសួង​អប់រំ ក៏បាន​ប្រកាសថា នៅ​ម៉ោង ៤ រសៀល ថ្ងៃទី​២៩​សីហា លទ្ធផល​ប្រលង​បាក់​ឌុប នៅ​ភ្នំពេញ និង​នៅ​ខេត្តកណ្តាល ក៏ត្រូវ​ផ្សព្វផ្សាយ​តាម​ប្រព័ន្ធ​អ៊ិន​ថឺ​ណេ​ត និង​តាម​ហ្វេ​ស​ប៊ុ​ក របស់​ក្រសួង​អប់រំ ដែលមាន​អ​សយ​ដ្ឋា​ន​៖ www.moeys.gov.kh និង www.facebook.com/moeys.gov.kh​។​

​យ៉ាងណាក៏ដោយ ចំពោះ​អ្នកធ្លាក់​ការប្រលង​បាក់​ឌុប លើក​នេះ ក៏មាន​សិទ្ធិ​នឹង​ប្រលង​លើក​ទី​២ ដែល​ក្រសួង​អប់រំ យុវជន និង​កីឡា គ្រោង​នឹងធ្វើ​នៅ​ថ្ងៃទី​១៣​តុលា​៕​