អីុរ៉ង់លែងផ្តល់ប្រាក់ប្រចាំខែដល់អ្នកមានដើម្បីបន្ថយបន្ទុកថវិកាជាតិ
អីុរ៉ង់លែងផ្តល់ប្រាក់ប្រចាំខែដល់អ្នកមានដើម្បីបន្ថយបន្ទុកថវិកាជាតិ
ថ្ងៃចន្ទ ទី៤ ខែឧសភា ឆ្នាំ២០១៥ ម៉ោង ០៩:១២
រ៉យទ័រ កាលពីពេល ថ្មីៗកន្លងមកផ្សាយថា រដ្ឋាភិបាលអីុរ៉ង់បានកាត់ឈ្មោះក្រុមអ្នកមានទ្រព្យស្តុកស្តម្ភចេញពីបញ្ជីឈ្មោះពលរដ្ឋដែលទទួលប្រាក់ឧបត្ថម្ភប្រចាំខែពីរដ្ឋាភិបាល ដើម្បីកាត់បន្ថយបន្ទុកថវិកាជាតិ និងធ្វើឱ្យមូលនិធិរបស់រដ្ឋាភិបាលកាន់តែឯករាជ្យ ។
បទដ្ឋានថ្មីនោះ នឹងជួយដល់អីុរ៉ង់ជាប្រទេសពឹងផ្អែកលើការនាំចេញប្រេង និងកំពុងរងផលប៉ះពាល់ពីថ្លៃប្រេងធ្លាក់ចុះអាចសន្សំប្រាក់ក្នុងមួយខែប្រហែល៣លានដុល្លារ ។
ចាត់ទុកថា ជាបទពិសោធន៍នៃការឧបត្ថម្ភដល់ប្រជាជនរបស់ប្រធានាធិបតីហាស់សាន់ រ៉ូហានី ជាអ្នកនយោបាយអព្យាក្រឹតដឹកនាំប្រទេស ខណៈពេលអីុរ៉ង់កំពុងស្ថិតក្នុងការចរចាជាមួយប្រទេសមហាអំណាចទាំង៦នៅលើពិភពលោកទាក់ទិននឹងគម្រោងការនុយក្លេអ៊ែររបស់អីុរ៉ង់ ដោយរំពឹងថា នឹងទទួលបានលទ្ធផលជាផ្លែផ្កានៅចុងខែមិថុនា ២០១៥ ។ បញ្ហាសំខាន់ស្ថិតនៅត្រង់ថា អីុរ៉ង់នឹងមិនអាចផលិតអាវុធនុយក្លេអ៊ែរជាថ្នូរនឹងការលុបចោរទណ្ឌកម្មផ្នែកសេដ្ឋកិច្ច និងជីវភាពរស់នៅរបស់ពលរដ្ឋទេ ។
បច្ចុប្បន្នអីុរ៉ង់មានប្រជាជនចំនួន៨០លាននាក់ ដែលរដ្ឋាភិបាលបានចាប់ផ្តើមចែកប្រាក់ដល់ពលរដ្ឋគ្រប់រូបក្នុងម្នាក់១៥ដុល្លារ ក្នុងមួយខែ ចាប់តាំងពីឆ្នាំ២០១០មក ដើម្បីឧបត្ថម្ភលើម្ហូបអាហារ និងថាមពល ។ កាលពីឆ្នាំមុន មានពលរដ្ឋអីុរ៉ង់ប្រហែល៤លាននាក់ ស្ម័គ្រចិត្តលះបង់សិទ្ធិទទួលការចែកប្រាក់ពីរដ្ឋ ។ គម្រោងការចែកប្រាក់នេះបានចាប់ផ្តើមឡើងតាំងពីជំនាន់អតីតលោកប្រធានាធិបតីម៉ាមូត អាម៉ាឌីនេចាត់ ហើយក្រោយមករងការវាយប្រហារ ធ្ងន់ៗពីករណីបែងចែកប្រាក់ជាង៩០% ដែលបានពីការកាត់បន្ថយលើការឧបត្ថម្ភដល់យោធា និងថាមពល ទៅប្រើប្រាស់សម្រាប់បរិច្ចាគប្រចាំខែដល់ពលរដ្ឋ ។
លោក អាលី រ៉ាបៃអីុ រដ្ឋមន្ត្រីក្រសួងការងារបានថ្លែងកាលពីថ្ងៃទី២៩ មេសា ថា ពលរដ្ឋអីុរ៉ង់ដែលមានទ្រព្យស្តុកស្តម្ភប្រហែល២០០.០០០នាក់ រួមទាំងជនជាតិអីុរ៉ង់ស្នាក់នៅឯបរទេសត្រូវអាជ្ញាធរកាត់ឈ្មោះចេញពីបញ្ជីកាលពីពេល ថ្មីៗកន្លងមក ៕
No comments:
Post a Comment