ចាប់ខ្លួនមេខ្លោង២នាក់បង្កហិង្សាដោយចេតនានៅភូមិឡពាង

Posted by: Anonymous
Date: 4:54 AM

ចាប់ខ្លួនមេខ្លោង២នាក់បង្កហិង្សាដោយចេតនានៅភូមិឡពាង

ដោយ ៖ផ្កាយព្រឹក

ថ្ងៃអង្គារ ទី២២ ខែកក្កដា ឆ្នាំ២០១៤ ម៉ោង ១៥:១៦

កោះសន្តិភាព

ខេត្តកំពង់ឆ្នាំង ៖ ជនសង្ស័យចំនួន២នាក់ក្នុងចំណោមជាច្រើននាក់ ដែលបានប្រើអំពើហិង្សាដោយចេតនាបណ្តាលឱ្យកម្មករធ្វើរបងរបស់ក្រុម ហ៊ុនរងរបួសជាង១០នាក់ និងរបងរបស់ក្រុមហ៊ុន K.D.C បានរងការខូចខាតជាច្រើនកន្លែង កាលពីរសៀលថ្ងៃទី១៧ កក្កដា ២០១៤ ត្រូវកម្លាំងនគរបាលខេត្តចាប់ឃាត់ខ្លួនបានហើយកាលពីថ្ងៃទី២១ កក្កដា ២០១៤ និងកំពុងកសាងសំណុំរឿងបញ្ជូនទៅតុលាការ ។

មន្ត្រីនគរបាលខេត្តបាននិយាយថា ជនសង្ស័យទាំង២នាក់ ម្នាក់ឈ្មោះ សៀង ហេង អាយុ៣៤ឆ្នាំ មានទីលំនៅភូមិបឹងកក់ និងម្នាក់ទៀតឈ្មោះ ម៉ាង យ៉ាវ អាយុ២៣ឆ្នាំ រស់នៅភូមិសំរោង ឃុំតាជេស ស្រុកកំពង់ត្រឡាច ។ ប្រភពដដែលបានបន្តថា ជនសង្ស័យទាំង២នាក់ កាលពីថ្ងៃទី១៧ កក្កដា បានមកជួបជុំគ្នានៅផ្ទះមេខ្លោងឈ្មោះ ស្ងួន ញឿន បានបង្កហិង្សាប្រើដំបង កាំបិត ពូថៅ ចំពាមកៅស៊ូ ញញួរ ដេញវាយ បាញ់ចំពាមកៅស៊ូ មកលើកម្មកររបស់ក្រុមហ៊ុនដែលកំពុងធ្វើរបងលើព្រំដីរបស់ក្រុមហ៊ុន បណ្តាលឱ្យរងរបួសធ្ងន់-ស្រាលជាង១០នាក់ ព្រមទាំងចូលវាយបំផ្លាញរបងបណ្តាលឱ្យបាក់ជាច្រើនកន្លែងទៀតផង ។

ក្រោយមកក្រុមហ៊ុនបានដាក់ពាក្យប្តឹងជនបង្កទាំងនោះ ដែលមានមេខ្លោង គឺ ស្ងួន ញឿន និងប្រពន្ធ អុំ សុភី ចំណែកមេខ្លោងបន្ទាប់ទៀតគឺជន២នាក់ ដែលបានចាប់ខ្លួនខាងលើនេះ និងនៅសេសសល់មួយចំនួនទៀត ដែលសំណុំរឿងនេះកំពុងស្ថិតនៅក្នុងដៃអ្នកច្បាប់កំពុងចាត់ការ ។

តាមចម្លើយសារភាពរបស់ជនសង្ស័យទាំង២នាក់ បានប្រាប់ថា នៅថ្ងៃទី១៧ កក្កដា ពួកខ្លួនមានគ្នាប្រមាណជាង៨០នាក់ បានមកជួបជុំគ្នា នៅផ្ទះឈ្មោះ ស្ងួន ញឿន នៅភូមិឡពាង ឃុំតាជេស ដោយមានកាំបិត ពូថៅ ចំពាមកៅស៊ូ ចបជីក ចបកាប់ ដំបង កំពួច ដើម្បីធើ្វសកម្មភាពសម្រុកចូលវាយកំទេចរបងរបស់ក្រុមហ៊ុន ។

នៅរសៀលថ្ងៃនោះ ពេលធ្វើសកម្មភាពបាញ់គ្រាប់ចំពាមកៅស៊ូ និងដំបងចូលវាយកំទេច ពួកខ្លួនមិនបានដឹងថា បាញ់ចំអ្នកណាខ្លះទេ ប៉ុន្តែខាងខ្លួនក៏រងរបួសខ្លះដែរ ។ ការធ្វើយ៉ាងនេះព្រោះពួកខ្លួនចង់ឱ្យក្រុមហ៊ុនបញ្ឈប់សកម្មភាពសាងសង់ របងសិន ព្រោះមិនទាន់បានដោះស្រាយទំនាស់ចប់នៅឡើយ ។ ក្នុងចម្លើយសារភាពបានបញ្ជាក់ថា កន្លងមកក្នុងសកម្មភាពតវ៉ា និងធ្វើសកម្មភាពកន្លងមក មានខាងអង្គការ UN មានលោក ដួង ចិត្រា តំណាងគណបក្សសង្គ្រោះជាតិ មន្ត្រីសិទ្ធិមនុស្ស និងតំណាងសមាគមមកពីខេត្តពោធិ៍សាត់ ជាអ្នកមកឃ្លាំមើល និងជួយលើកទឹកចិត្ត ។

តំណាងក្រុមហ៊ុន K.D.C បាននិយាយថា គ្មានទំនាស់រឿងដីធ្លីនោះទេ ព្រោះដីរបស់ក្រុមហ៊ុនបានទិញដោយស្របច្បាប់ កាលពីឆ្នាំ២០០៧ ខណៈដែលដីរបស់ម្ចាស់មុនបានធ្វើប្លង់កម្មសិទ្ធិត្រឹមត្រូវតាំងពី ឆ្នាំ១៩៩៧ ហើយក្នុងរយៈពេល១០ឆ្នាំ ដែលម្ចាស់មុនបានធ្វើកម្មសិទ្ធិ និងកាន់កាប់ហេតុម្តេច ក៏គ្មានការតវ៉ា ។ លុះពេលក្រុមហ៊ុនបានទិញដីនោះនៅឆ្នាំ២០០៧ ស្រាប់តែមានអ្នកមកតវ៉ា ។ តាមផ្លូវច្បាប់របស់ភូមិបាលក្នុងរយៈពេល១០ឆ្នាំ គឺផុតអាយុកាលនៃការតវ៉ាហើយ ។

ប៉ុន្តែក្រោយមកដោយសារតែក្រុមហ៊ុន មានសណ្តានចិត្ត មុនចូលឆ្នាំខ្មែរ នៅឆ្នាំ២០១៤ នេះក្រុមហ៊ុនបានសុខចិត្ត ជួយឧបត្ថម្ភប្រាក់គោលនយោបាយ ឱ្យប្រជាពលរដ្ឋអ្នកភូមិឡពាងចំនួន៥២គ្រួសារ នៅសល់បច្ចុប្បន្នចំនួនតែ១៥គ្រួសារប៉ុណ្ណោះ ដែលមានមេខ្លោង ឈ្មោះ ស្ងួន ញឿន និងប្រពន្ធ ឈ្មោះ អុំ សុភី ។ តំណាងក្រុមហ៊ុនបានបន្តថា ក្រោយពីដោះស្រាយគោលនយោបាយ អ្នកភូមិឡពាងជិតអស់ទៅហើយ ស្រាប់តែឈ្មោះស្ងួន ញឿន និងប្រពន្ធ បានកែនកម្លាំងបន្ថែមទៀត ពីភូមិបឹងកក់ និងភូមិសំរោង មកជាកម្លាំងតវ៉ាជាមួយក្រុមហ៊ុនបន្ថែមទៀតឡើងអ្នកតវ៉ាដល់៨២គ្រួសារ ក្នុងនោះអ្នកភូមិបឹងកក់មានឈ្មោះ សៀង ហេង ជាមេខ្លោង ព្រោះសំអាងថា អ្នកភូមិឡពាងបានគោលនយោបាយ ដូច្នេះត្រូវតែដោះស្រាយគោលនយោបាយខ្លះដូចអ្នកភូមិឡពាងដែរ ។

ក្រោយពីបានកម្លាងច្រើនឡើងវិញ ក្រុមនេះ បានធ្វើសកម្មភាពតវ៉ាបិទផ្លូវជាតិ មកស្នងការដ្ឋាន មកសាលាខេត្តជាដើម ។ ប៉ុន្តែក្រុមហ៊ុនបានប្រកាសហើយថា គឺមិនដោះស្រាយប្រាក់គោលនយោបាយឱ្យអ្នកភូមិបឹងកក់ និងអ្នកភូមិឯទៀត ដែលឃើញគេបានប្រាក់មកចង់បាននឹងគេដែរឡើយ គឺមកដល់ពេលនេះថ្វីបើក្រុមហ៊ុនបានទទួលសិទ្ធិពីរាជរដ្ឋាភិបាល ក្នុងការអភិវឌ្ឍន៏តំបន់សេដ្ឋកិច្ចពិសេសក៏ពិតមែន ប៉ុន្តែក្រុមហ៊ុននៅតែមានជំហរដោះស្រាយប្រាក់គោលនយោបាយឱ្យ១៥គ្រួសារ ក្នុងភូមិឡពាងដដែល ។

តំណាងក្រុមហ៊ុនបានបញ្ជាក់ថា ឈ្មោះ សៀង ហេង និងឈ្មោះ ម៉ាង យ៉ាវ នៅភូមិបឹងកក់ និងភូមិសំរោង ឆ្ងាយពីភូមិឡពាង តែបានមកធ្វើសកម្មភាពនៅផ្ទះ ស្ងួន ញឿន នៅភូមិឡពាង គឺឆ្ងាយគ្នាជាង២គីឡូម៉ែត្រ ។ ទាំង២នាក់ជាមេខ្លោងដឹកនាំកម្លាំងពីភូមិបឹងកក់ មករួមជាមួយអ្នកភូមិឡពាង១៥គ្រួសារ បានធ្វើសកម្មភាពអនាធិបតេយ្យលើថ្នល់ជាតិ និងធ្លាប់បានដុតគប់ដបសាំងមកលើសមត្ថកិច្ចទៀតផង។ មន្ត្រីនគរបាលបាននិយាយថាក្នុងសំណុំរឿងជនសង្ស័យខាងលើនេះ ត្រូវបានចោទប្រកាន់២ករណីផ្សេងគ្នា គឺ១-បទបង្កហិង្សាដោយចេតនា និង២-បទប្រើហិង្សាធ្វើឱ្យខូចខាតទ្រព្យសម្បត្តិអ្នកដទៃដោយចេតនា ។

ចំណែកបក្សពួកមួយចំនួន ក៏ត្រូវចោទប្រកាន់ដូចគ្នានេះដែរ តែពេលនេះពួកគេកំពុងលាក់ខ្លួនសម្ងំមិនហ៊ានចេញ ដែលមនុស្សទាំងនោះគេចពីចូលពន្ធនាគារមិនរូចឡើយ៕